由細到大，海盜對我黎講都係一種好 fictional 嘅『職業』，覺得已經消失咗幾百年，就算係喺電影都唔係經常出現。『而家邊有海盜呀？』

自從呢一兩年廣泛報導索馬里海盜，令我知道海盜已經『走出歷史』。由於 Summer Course 有個課程係想用多ｄ authentic texts 做教材 (個 course 開唔開得成或者收得好唔好都未知 ... )，我呢一個幾月好似中學讀書咁要成日睇英文報紙，剪低有關嘅報導『備用』。其中一份 handout 我預咗用索馬里海盜做主題，截至呢一刻為止，我睇咗四月上旬到下旬 11 篇報導，雖然每篇都唔算長，不過我就好似呢大半個月一直追住ｄ消息咁 ......

索馬里海盜咁猖獗，以我理解，係因為自從九十年代初開始，索馬里內戰不斷，國家都冇乜制度可言，民不聊生；外國漁船又趁機黎非法捕魚或者傾倒有害廢料。當地人發現喺驅趕ｄ外國人嘅同時，可以靠做海盜搵到大錢同快錢，搞到海盜問題越黎越嚴重。我諗，佢哋覺得橫又死掂又死，又唔係一定會畀人捉到，ｄ外國人條命又矜貴，實肯畀錢架，所以真係博埋條命都試得過；於是，連『可以說不』、而家仲話『不高興』嘅中國都冇面畀 ！！！！！

唔 ...... 以上純屬個人意見。

四月，花見嘅月份。

上年四月尾終於首次去咗『追』櫻，係去咗日本咁多年嘅第一次，地點係東北四縣 (宮城、岩手、秋田、青森)；亦係 2008 『一年 / 連三趟』日本旅行嘅頭炮 ( !!!) ...... 一年後嘅四月，我都係呢排先諗起又到花見季節 (我好鐘意『花見 (はなみ)』ha-na-mi 呢個詞)，就等我用十六張相概括吓上年十日嘅花見之旅：


等緊上早機嘅奧斯卡 ......


岩手縣：厳美渓 (個地方名好有意境 )。由於天氣越黎越早回暖，呢個喺成個旅程中第一個嘅景點去到嘅時候啱啱好係満開，一落巴士仲體驗到咩叫桜吹雪 (さくらふぶき)，開心到傻咗；喺往後嘅日子仲有好幾次大大細細嘅桜吹雪。


(左) 岩手縣：北上展勝地 (『日本さくらの会』選定嘅『さくら名所100選』之一，落住雨我都專程搭的士去，可惜當時去到已經開始散落) 附近一個民俗村內。張相我係左手揸遮，右手揸機影嘅，我好鐘意影ｄ花瓣吹咗落水嘅畫面 -- 好有詩意。
(右) 秋田縣：桧木内川堤 (又係『さくら名所100選』) 對面一棵櫻花樹，隔離係我都好鐘意嘅山茶花 (つばき)，第一次喺之前岩手縣個民俗村見到仲以為係玫瑰  ...... 當時桧木内川堤又係已經花落。


青森縣：弘前公園 (當然都係『さくら名所100選』，喺花見界地位極高，因為嗰度ｄ櫻花又多又密，就算以全日本計都係頭三位必去景點，所以每年都有大把好似我呢ｄ慕名而來嘅遊客；睇番資料，包括埋我 2008 年有大約二百萬人去過弘前公園！我初初到埗見到個駅咁多人都嚇親 ......) 可惜ｄ櫻花又係開得太快，當時去到已經開始散落 ...... 不過一場去到，夜櫻又睇一次 (左)，第二朝又去多一次 (右)。嗰度ｄ花嘅數量、質量同周圍環境、設備嘅配合都真係令佢有可以稱得上日本第一櫻嘅條件 (至少我咁認為)，去完唔會覺得佢『名不副實』，只可恨我去得太遲，睇唔到最靚嘅情景。


青森縣：合浦公園。當時天氣好好，不過都係凍，我仲貪得意用 ￥100 食咗個日式懷舊雪糕；跟住風一吹，再次感受到強勁而持久嘅桜吹雪。


(左) 青森縣近海，所以出名食海鮮。呢個喺 basement 嘅食場好似幾出名，香港人好似都識搵到黎，當晚都有一枱幾個操純正廣東話嘅女士們喺我附近。呢個 set 好似係 ￥1400。
(右) 搭三個鐘巴士去奥入瀬渓流：非常注意車內安全嘅奧斯卡 ......


(左) 宮城縣：塩竈神社。呢度有自家嘅塩竈桜，係縣內最遲開嘅品種，所以當時去到睇都算係満開。
(右) 去松島例牌要遊船河，又例牌要餵海鷗；我係喺香港嘅零食物語『自備』咗幾包細蝦條帶過去 ( !!!)，一邊餵海鷗一邊自己食。就喺我單手影完呢幅相嘅時候畀海鷗先生 deung 咗一吓，搞到我好驚會因此染上禽流感 (香港政府話唔好餵飼禽鳥吖嘛) -- 因為有日去過嘅十和田湖喺之後嗰日睇日本當地新聞真係話發現咗有感染 H5N1 嘅死鳥 ......


松島話明係個島，梗係又係出名食海鮮。不過之前行行行，行咗去第二度，已經搞到好晏，去完一個 museum 都成三點幾，居然係先食雪糕，再行番到中心區，成四點先食呢個迷你海鮮飯，好似 ￥700。
 

松島其實係由大大細細好多個島組成，呢度係行完一條長長嘅橋去咗一個細島再原路行返去松島時影嘅『懶係藝術相』( ???)。


最後一日由仙台返落去東京，上晝先去 Tokyu Hands 血拚，再喺駅入面死命買食得嘅手信，所以有呢個一袋二袋嘅畫面。


離開工作崗位個幾禮拜嘅後遺症 ......

如果你真係由頭睇到尾咁捧場，多謝晒！最後以一首我好鐘意嘅詩結束呢個長長嘅 post：
『春有百花秋有月，夏有涼風冬有雪；若無閑事掛心頭，便是人間好時節。』

我呢幾年黎都好鐘意睇ｄ有關二次大戰同北韓嘅史料，因為兩者有個共通點：非常有娛樂性。當然，背後都係悲慘嘅故事 ......

今晚喺 ATV World 睇咗一個 National Geographic 拍嘅一個紀錄片，講一個尼泊爾眼科醫生獲准進入北韓十日，目標係幫過千名白內障病人做手術，有講到首都不時會停電，醫護隊連發電機都要自己帶埋黎 ！除咗個醫生，仲有攝製隊扮係佢嘅醫護人員，佢哋有正常獲准拍攝做手術嘅情況，亦獲准去一個家庭做訪問 (個美籍亞裔嘅女記者居然有一吓問到個家庭覺唔覺得金正日有犯過錯，仲要重複問幾次，個翻譯聽到話『唔明問乜』 ...... 我真係擔心個女記者呀)。當然， 即使喺北韓『看守人』嘅一路陪同下，佢哋都有靜雞雞拍攝。

成日都話北韓畀世界睇得嘅都係好嘅嘢啦，其中有播到之前另一個荷蘭紀錄片嘅片段：影個女人帶個女返學，好母慈女孝咁款啦，路上唱吓歌，翻譯出黎嘅歌詞有一句係話要美國人跪地求饒 ！然後個女人返工廠做嘢又好開心呀、返到屋企一家人食飯又好好餸咁呀、最緊要就係膜拜吓『親愛嘅領袖』、『親愛嘅將軍』咁囉 ......

之後又講吓北韓ｄ人民生活點樣慘，金正日一家就點樣奢華。曾經喺個電台節目聽到主持人有一個講得好中嘅 comment，我永遠都會記得：北韓唔係共產，係獨產，所有錢都係去晒姓金嗰家之嘛！

跟住又影吓ｄ北韓叛軍講點樣逃出生天，真係聽見 (再加埋模擬片段) 都心驚。最後影ｄ病人要拆紗布睇吓手術成唔成功，個個都睇得返嘢，但個個第一時間都係走去『親愛嘅領袖』、『親愛嘅將軍』嘅肖像前三跪九叩、講晒『萬歲』，冇一個有多謝個醫生喎，係咪有病呀 ！有個阿伯仲激，話睇返嘢就要幫國家殺晒ｄ美國人喎 ！National Geographic 個女記者嘅旁述提到：眼睇咁多人重複做住講住同一樣嘢，究竟當中有幾多人係真心，有幾多人係因為恐懼而做戲呢？經過咁多年嘅極權統治，信念同恐懼已經分唔開 ......

我都仲未有時間睇嗰本『中國比小說更離奇』。不過，見到個個北韓人都好似著咗魔咁崇拜、神化『親愛嘅領袖』，將『中國』兩個字換做『北韓』應該可以又出一本書 ..... 如果真係有呢本『北韓比神話更迷離』，我會第一時間去買 ......

話說今日晏晝 (而家係四月二號凌晨兩點五十，即係所謂四月一號夜晚兩點五十) 同 Miss Sin 去 Suzuki Cafe 食飯，餐飲要咗杯咖啡，都幾濃吓，我到而家都一ｄ唔眼瞓，喊露都冇打過半個呀！好彩 ... 星期四我冇朝早堂 ...