我呢幾年黎都好鐘意睇ｄ有關
二次大戰同
北韓嘅史料，因為兩者有個共通點：
非常有娛樂性。當然，背後都係悲慘嘅故事 ......
今晚喺 ATV World 睇咗一個
National Geographic 拍嘅一個紀錄片，講一個尼泊爾眼科醫生
獲准進入北韓十日，目標係幫過千名白內障病人做手術，有講到首都不時會停電，
醫護隊連發電機都要自己帶埋黎 
！除咗個醫生，仲有攝製隊扮係佢嘅醫護人員，佢哋有正常
獲准拍攝做手術嘅情況，亦
獲准去一個家庭做訪問 (個美籍亞裔嘅女記者居然有一吓問到個家庭覺唔覺得金正日有犯過錯，仲要重複問幾次，個翻譯聽到話『唔明問乜』 ...... 我真係擔心個女記者呀)。當然， 即使喺北韓『看守人』嘅一路陪同下，佢哋都有靜雞雞拍攝。
成日都話北韓畀世界睇得嘅都係好嘅嘢啦，其中有播到之前另一個荷蘭紀錄片嘅片段：影個女人帶個女返學，好母慈女孝咁款啦，路上唱吓歌，翻譯出黎嘅歌詞有一句係話
要美國人跪地求饒 ！然後個女人返工廠做嘢又好開心呀、返到屋企一家人食飯又好好餸咁呀、最緊要就係膜拜吓『
親愛嘅領袖』、『
親愛嘅將軍』咁囉 ......
之後又講吓北韓ｄ人民生活點樣慘，金正日一家就點樣奢華。曾經喺個電台節目聽到主持人有一個講得好中嘅 comment，我永遠都會記得：
北韓唔係共產，係獨產，所有錢都係去晒姓金嗰家之嘛！
跟住又影吓ｄ北韓叛軍講點樣逃出生天，真係聽見 (再加埋模擬片段) 都心驚。最後影ｄ病人要拆紗布睇吓手術成唔成功，個個都睇得返嘢，但個個第一時間都係走去『
親愛嘅領袖』、『
親愛嘅將軍』嘅肖像前三跪九叩、講晒『
萬歲』，
冇一個有多謝個醫生喎，係咪有病呀
！有個阿伯仲激，話
睇返嘢就要幫國家殺晒ｄ美國人喎
！National Geographic 個女記者嘅旁述提到：眼睇咁多人重複做住講住同一樣嘢，究竟當中有幾多人係真心，有幾多人係因為恐懼而做戲呢？經過咁多年嘅極權統治，信念同恐懼已經分唔開 ......
我都仲未有時間睇嗰本『中國比小說更離奇』。不過，見到個個北韓人都好似著咗魔咁崇拜、神化『
親愛嘅領袖』，將『中國』兩個字換做『北韓』應該可以又出一本書 ..... 如果真係有呢本『北韓比神話更迷離』，我會第一時間去買 ......
Comments (1)
其實仲有另一個講北韓的都好好睇的
叫Don't tell my mother that i am in North Korea
http://www.youtube.com/watch?v=E46KntXAqOM
你可以慢慢睇
我記得好睇過唔只呢兩套
我唔記得係呢套定你睇個套
有度係話張手術床勁污糟(應該係你睇個套)
有度就話有個小妹妹要練習就算幾辛苦都練
係因為類似講左D話領導人好偉大
(呢個應該係講北韓個"人肉"LCD mon)
其實佢地講親愛嘅領袖親愛嘅將軍就已經到左一種同人食飯要多謝神的程度差唔多
因為北韓真係好神化左金家
(你講得好啱...佢係獨產...唔係點會佢地一家咁肥...d平民咁瘦甚至餓死)
同埋我無記錯
有套係講到d人問個北韓"領隊"係北韓有無同性戀個陣
佢地係好似係問番咩黎,跟住話無...
(同樣道理,問佢地AIDS都會答無)
你有興趣可以係youtube搵下
有好多講完真係好貼切"北韓比神話更迷離"